logo-dark

Latest News

रमन के गोठ(हल्बी) : आकाशवाणी से प्रसारित विशेष कार्यक्रम (10 सितम्बर, 2017)

पुरूष उद्घोषक

सपाय सुनतो लोग के जुहार ।

-आकाशवाणी चो खास प्रसारण ‘रमन के गोठ’ ने आमी सपाय सुनतो लोग चो हिरदे ले मान करूंसे । कार्यक्रम चो 25 वीं कड़ी काजे आकाशवाणी चो स्टूडियो ने माननीय मुख्यमंत्री जी अमरलासोत ।

-डॉक्टर साहब, जुहार, तुमचो खूबे खूबे स्वागत करूंसे ये कार्यक्रम ने ।

 

मुख्यमंत्री

-स्टूडियो ने मोचो स्वागत करतो काजे तुमचो खूबे खूबे धन्यवाद । मंय आपलो सपाय श्रोता मन के खास हिसाब ने धन्यवाद दंयसे जे रोजे महेना दूसर हफ्ता चो अयतवार दिने बिहाने 10 बजून 45 मिनट ले मूर होतो ये कार्यक्रम के टाकू रसोत ।

-जमाय संगी-संगवारी, सियान-जुआन, आया बहिन मन के मोचो बाट ले जुहार ।

-तीजा पोरा, जन्माष्टमी, गनेश पाख, बकरीद तिहार, हरीक उदीम ने होली । आउर जमाय लोग हरीक उदीम संगे आपलाहान काम धंधा ने फेर भिड़ुन गेलासाहास ।

-पितर पाख मूर होउन गेलीसे । आपलो पुरखा मन के सुरता करूंसे, तरपन करूंसे आउर पितर मन के पानी देउंसे ।

-पितर पाख जायदे, तेबे नवरात मूर होयदे । आमचो राज्य चो चारो कूती ने आदिशक्ति देवी, बिराजला से । मॉं दंतेश्वरी, मॉं बम्बलेश्वरी, मॉं महामाया, मॉं चन्द्रहासिनी चो शक्तिपीठ आसे । ऐचो ले आउर गोटोक गोटोक जिला ने, शहर ने, गांव ने बले दूसर दूसर रूप ने देवी चो वास आसे । नौ दिन ले देवी माय चो नौ रूप चो पूजा पस्टा होयदे । बड़े बड़े ठान ने माय दुर्गा के बसादे । आउर 30 तारीख के दसराहा तिहार होयदे । दंतेश्वरी माई चो कीरता आय कि आमचो बस्तर दसराहा दुनिया चो सबले आगर 75 दिन चलतो उत्सव-तिहार आय ।

-तुमी सपाय के नवरात आरू दसराहा तिहार चो खूबे खूबे बधाई आरू शुभकामना देंयसे ।

महिला उद्घोषक

-माननीय मुख्यमंत्री जी, तुमी खूबे नंगत गोठ के बललास कि आमचो भारतीय संस्कृति ने आपलो पुरखा मन के पूजा करतोर आउर हुन मन चो सांगलो बाट ने हिंडतोर गोठ के खूबे मान देतोर होयसे ।  असनी गोटोक खास मोहका आमचो पूरे आसे ।  गुलाय देस ने पं. दीनदयाल उपाध्याय जी चो जन्म शताब्दी बरख मनातोर, एबे होयसे । पं. उपाध्याय चो जस आउर करलो नंगत काम, काजे लोग मन चो मने, जानतोर खूबे साद आसे । एई काजे आमचो सुनतो लोग के ये मन चो किरपा के सांगलो ने नंगत होती ।

मुख्यमंत्री जी

-सबले पहिल तो मंय पं. दीनदयाल उपाध्याय के पांय पड़ेंसे । भगवान हर जुग ने कोनी असन महापुरूस के ये संवसार ने पठायसे, जे दुनिया के नंगत बाट दखायसे ।

-पं. उपाध्याय असनी चे बड़े गियानी रला ।

-पं. उपाध्याय चो जनम असनी गृहस्थ परिवार ने होउ रहे, मांतर हुन इतरो गियानी रहोत कि मेट्रिक आउर इंटरमीडिएट चो परीक्षा ने पहिल नंबर ने पास होउ रला । सिविल सेवा चो परीक्षा ने सफल होला, मांतर चुछाय जीवना-खावना हुन मन चो जीवना चो सोर नी रहे । येई काजे हुन मन भारत माय चो सेवा चो बाट के धरला । सांस्कृतिक राष्ट्रवाद बललो ने संस्कृति चो हिसाब ने देस के दखतोर आरू मानतोेर, एकात्म मानव दर्शन आरू अंत्योदय ये सपाय नंगत बाट आमके दखाला, जे आमचो जीवना काजे साहा असन आत ।

-पं. उपाध्याय जी एकात्म मानववाद आरू अंत्योदय चो हिसाब ने संवसार के मनुक मांदी चो सेवा करतो काजे खूबे नंगत अचरिज माहा संदेस देउन रला ।

-हुन मन बलू रहोत कि आमचो राष्ट्रीयता काजे मूर टेका बलले आधार आमचो भारत माता आय । एथा ले जसन आमी माय सबद के गुचाउन देउंसे, हुदलदांॅय भारत सोजे भूंई चो गोंदी रहुन जायदे ।

-पं. उपाध्याय बलू रहे कि गोटोक बीज ले निकरलो बूंद, जड़, खंदी, ढेटा, पाना पतर, फूल, फर सपाय चो रूप रंग भिने भिने आत मांतर बीज चो हिसाब ने ए मन चो गोटकी होतो नाता के चीनुक होयसे । असनी हुन मन मनुक मांदी काजे बले ‘गोटकी रतो’ एकात्मता चो गोठ के सांगू रला, जे थाने मनुक मनुक चो मंजी एका रहो, लड़ई चो काहॉंय कोनी ठान नी रोहो ।

-हुन मन समाज चो सबले असकत कमजोर लोग मन उपरे आगर धियान देउन बलू रला । जेचो ले हुन मन झपके उपरे एओत आउर सावकार गरीब चो भेद नी रोहो । असकत लोग मन के बले जीवना के नंगत बनातोर आरू बाड़ती करतोर सपाय बेवस्था मन चो फायदा मिरूक सको ।

-येई काजे पं. दीनदयाल उपाध्याय के आमी ‘युग-पुरूष’ मानूंसे आउर हुन मन चो कीरता आरू करलो नंगत करनी के सपाय जानोत बलते, छत्तीसगढ़ ने 15 सितंबर ले 25 सितंबर तक गोटोक बिसेस आयोजन करतोर जाहला सरकार बाट ले करलो आसे, एचो ले समाज ने एका होउन बाड़ती चो बाट ने हिंडतोर झपके होउक सको, ये उवाट आय ।

पुरूष उद्घोषक

-माननीय मुख्यमंत्री जी, पं. दीनदयाल उपाध्याय जन्मशती समारोह चो मोहका ने 15 सितम्बर ले धरून 25 सितम्बर ने कसन कसन आयोजन होदे ? काय ये गोठ के बले तुमी खिंडिक सांगूआहास ?

मुख्यमंत्री जी

-15 सितंबर ले 25 सितंबर तक प्रदेश चो सपाय स्कूल आरू कॉलेज ने पं. उपाध्याय चो जीवना उपरे लोक संगीत, नाचा, नाटक, निबंध, चित्रकला, भाषण, वाद विवाद प्रतियोगिता मन होदे ।

-विश्वविद्यालय मन ने एकात्म मानववाद उपरे सम्मेलन, सेमीनार मन संगातोर होयदे ।

-सपाय 27 ठान जिला ने भिने-भिने ठान मन ने पं. दीनदयाल उपाध्याय चो जीवना उपरे कथा सांगतोर उवाट बनातोर होयदे ।

-गांव मन ने खेलकूद प्रतियोगिता, स्वास्थ्य शिविर, कृषि मेला जसन आयोजन मन करतोर होयदे ।

-गुलाय प्रदेश ने उपाध्याय जी चो जनमदिन 25 सितंबर दिने विशेष ग्राम सभा चो आयोजन होयदे, जे थाने हुनचो जीवना के पड़ुन सुनातोर होयदो । कयेक विभाग मन बाट ले अंत्योदय आरू गरीबी उन्मूलन उपरे चलातोर योजना मन चो जानकारी देतोर होयदे ।

-प्रदेश ने पं. दीनदयाल उपाध्याय चो नांव ने चलतो बीती योजना मन, कार्यक्रम मन चो जानकारी मन के जुहाउन जनता लगे अमरातोर होयदे ।

 

-असन अंत्योदय काजे राज्य सरकार बाट ले करतोर उवाट मन के धरून जन-जागरण करतोर होयदे, जेचोले जे मन के ये योजना मन चो फायदा मिरूक सके, असन लोग मन फायदा धरूक सकदे ।

-पं. दीनदयाल उपाध्याय जन्मशती समारोह कार्यक्रम चो सरासरी करतोर 11 फरवरी 2018 ने ‘पंचायती राज सम्मेलन’ करून करतोर होयदे ।

महिला उद्घोषक

-माननीय मुख्यमंत्री जी, छत्तीसगढ़ ने पं. दीनदयाल उपाध्याय चो सुरता के धियान देउन सुरता के हरमेशा काजे संगातो काजे कयेक बड़े बड़े उवाट करलो आसे, ये काम मन ने खिंडिक माहा नंगत बीती काम मन के आमचो सुनतो लोग के सांगतोर किरपा करा ।

मुख्यमंत्री जी

-तुमके ये जानुन हरीक लागेदे कि राज्य ने पं. दीनदयाल उपाध्याय गरीब कल्याण बरख मनाउन एचो मान के हरमेशा काजे संगातोर हिसाब खूबे डॉंहका पकालो आसे ।

-असकत मांदी बलले कमजोर तबका के रतो घर देतो काजे पं. दीनदयाल उपाध्याय आवास योजना चलातोर होयसे । असनी कयेक योजना मन चो नांव पं. उपाध्याय चो नांव ने संगालोर आसे ।

-पं. दीनदयाल उपध्याय सम्पूर्ण वांग्मय पुस्तक चो सेट सपाय गांव आरू जनपद पंचायत मन के दिलो आसे । संगे संगे सहर मन ने बले अमरातोर होेयसे । मय अपील करेंसे कि ये पुस्तक मन के पड़तो काम जमाय हिसाब ने होओ, बड़े ले धरून नानी सपाय पड़ोत, एचो ले एकात्म मानववाद आरू अंत्योदय बीती गोठ चो फायदा सपाय के मिरूक सकेदे ।

-नया रायपुर ने मंत्रालय के परमुख सड़क ले जोड़तो बीती बाट चो नांव ‘एकात्म पथ’ संगालो आसे ।  संगे संगे परमुख चैराहा ने पं. दीनदयाल उपाध्याय चो खूबे बड़े मूरित बले स्थापना करलो आसे, जेचो लोकार्पण माननीय प्रधानमंत्री श्री नरेन्द्र मोदी बाट ले होउ रली ।

-आमचो शासन-प्रशासन चो नंगत गुन मन ने ‘नवाचार’ बाट ले खूबे काम होली से । मय तुमके सांगूक चाहेंसे कि कोरबा जिला चो कटघोरा विकासखंड चो स्याहीमुड़ी गांव ने पं. दीनदयाल उपाध्याय शैक्षणिक परिसर के बनातो काम खूबे झपके झपके करतोर होयसे ।

-ये अंचल ने अनुसूचित जनजाति खूबे आसोत ।

-बलतोर गोठ ये आय कि ये परिसर चो फायदा अंत्योदय ठाने मिरेदे ।

-40एकड़ भूंई ने 125 करोड़ रूपया खरचा ने 4 हजार सीट चो शैक्षणिक परिसर आपन के दखलो ने खूबे बड़े आरू अचरिज माहा आय ।

-एथा पहली ले धरून बारहवीं तक 4 हजार नोनी-बाबू मन के फोकाहा आवासीय बलले पड़तो आरू रतो सुविधा मिरेदे । 100सीट चो दिव्यांग आवासीय विद्यालय बले बनेदे । ये परिसर ने अत्याधुनिक शिक्षण प्रशिक्षण चो बेवस्था रहेदे ।

-ये परिसर ग्रीन बिल्डिंग आरू आई एस ओ प्रमाणित रहेदे , असन बेवस्था करतोर होयदे ।

-सरकारी ठान मन ने, आदिवासी खूबे रतो ठान मन ने असनी बड़े बड़े शिक्षा परिसर बनातोर हिसाब ने आमी सरलगा कोसित करते जाउंसे, एचो ले पहिल बस्तर चो लाफी ठान चो जिला दंतेवाड़ा ने जावंगा शिक्षा परिसर बनालो रहे, जेचो खूबे नांव बेले होली से ।

-असनी परिसर बीजापुर जिला आरू सुकमा जिला मन ने बले बनातो काम चलेसे, जे थाने सी एस आर, डी एम एफ आरू तीसर योजना मन ले पैसा कौड़ी चो सायता दिलो आसे, जे आपलो हिसाब ने गोटोक नवाचार आय ।

 

पुरूष उद्घोषक

-डॉ0 साहब, समर्थन मूल्य ने घेनलो धान काजे बोनस देतो जाहला गेलो दिन ने तुमी करलासाहास, एचो ले किसान भाई मन खूबे हरीक आसोत । किरपा करून, बोनस कसन देतोर बाटतोर होयदे ए गोठ के आउर एजो समाज काजे बले कसन उवाट रहेदे, एके सांगा ।

मुख्यमंत्री जी

-धान, छत्तीसगढ़ चो जीव आय । आमचो किसान भाई बहिन आरू हुनमन चो परिवार चो जीवना, धान चो कमानी, धान चो नंगत फसल आउर हुनचो बिकरी ले चे चलेसे  । किसान चो आपलो जीवना आउर प्रदेश चो अर्थव्यवस्था ने धान चो खूबे मान आसे । एई काजे आमी धान घेनतोर बेवस्था ने सुधार करतोर काम के आमी सबले मूर काम बनाउ रलू ।

-जेबे आमी सरकार चो काम के मूर करलू, तेबे प्रदेश ने लटे पटे 5 लाखा मीट्रिक टन धान घेनतोर होते रहे । घेनतोर हिसाब बले खूबे अडरा रहे आरू किसान मन के पयसा पावतो काजे बले खूबे डंड होते रहे ।

-आमी कम्प्यूटर बीती पारदर्शी बेवस्था बनालू । 1 हजार 333 प्राथमिक साख सहकारी समिति मन चो 1 हजार 989 उपार्जन केन्द्र मन ने धान घेनतो इंतजाम करलू, काय काजे कि किसान के आपलो गांव के छांडुन लाफी जाउक नी पड़ो ।

-बरख 2003-2004 ले धरून बरख 2016-17 तक 6 करोड़ 91 लाख 59 हजार मीट्रिक टन धान घेनुन भाती किसान मन के एबे 75 हजार करोड़ रूपया देतोर होली से ।

-आमी आमचो घोषणापत्र चो हिसाब ने बरख 2013-14 चो घेनलो 78 लाख 35 हजार मीट्रिक टन धान ने 3 सौ रूपया गोटोक कुंटल चो मोल हिसाब ने बोनस बले दिलू । तेबे किसान मन चो धान ने समर्थन मोल चो 10 हजार 362 करोड़ रूपया आरू बोनस चो 2 हजार 374 करोड़ रूपया अमरू रहे ।

-बरख 2015 ने प्रदेश ने बड़े अकाल होउ रहे, जेचो कारन राहत चो उपाय करतोर होउ रहे आरू 18 सौ करोड़ रूपया ले आगर चो पयसा किसान भाई मन के भिने-भिने मद ले देतोर होउ रहे ।

-एई मंजी प्रदेश किसान मन काजे कयेक नंगत कल्याणकारी फासला मन करतोर होली । फसल विविधीकरण, खेती कमानी चो खरचा कम कसन होयदे, खोजाकारी आरू तकनीकी उपाय ले फायदा बीती फसल उपजन कसन धरतोर होयदे, असन बाड़ती चो उवाट करतोर होली ।

-खेती कमानी ने खरचा कम होली, उपजन बाड़ली, एचो काजे प्रदेश के तीन हार चाउर उपजन आउर एक हार दार उपजन काजे ‘कृषि कर्मण’ पुरस्कार मिरली ।

-हार्टिकल्चर बाटे बले खूबे नंगत काम होतो के छत्तीसगढ़ के ‘एग्रीकल्चर लीडरशिप एवार्ड 2017’ मिरली से । प्रदेश ने गेलो 13 बरख चो करलो काम ने उद्यानिकी चो रकबा चार गुना आउर उपजन पॉंच गुना आगर बाड़ली से ।

-ये हार जेबे मानसून बरसा कम होली आउर प्रदेश चो कोनी-कोनी जिला ने अकाल माहा दखा दिली, तेबे ऐचो चिंता छत्तीसगढ़ ले धरून दिल्ली तक ने करतोर होली ।

-मंय आपलो मुंडी मुखिया मन संगे भेंटघाट करूक दिल्ली गेले तेबे आमचो राष्ट्रीय अध्यक्ष जी संगे खूबे चिंता हिसाब ने राज्य चो हाल के गोठयाले आउर मोचो सलाहा देतो के हव बलला कि आमके छत्तीसगढ़ ने किसान मन के धान चो बोनस दिले नंगत होयदे बलते ।

-माननीय प्रधानमंत्री श्री नरेन्द्र मोदी जी चो चिन्ता-फिकिर आरू किसान मन काजे हुन मन चो मया के तो सपाय जानोत चे । हुनमन बोनस बीती गोठ काजे तुरते हव बलला आउर पूरे एउन बलला कि कांई होओ, किसान मन के कांई तकलीस नी होतोर आय आउर हुन मन के सपाय बाट ले सायता मिरतोर चे आय ।

-असनी आमी ये फासला धरलूसे कि खरीफ 2016 ने घेनलो धान चो बोनस के येई दीवाली चो पहिल किसान मन के मिरून जाओ ।

-बरख 2016 ने 13 लाख ले आगर किसान मन ले 69 लाख 59 हजार मीट्रिक टन धान घेनतोर होउ रहे, जेचो उपरे  300 गोटोक कुंटल हिसाब ने बोनस देतो के 21 सौ करोड़ रूपया पैसा बाटतोर होयदे ।

-आमचो फासला आय कि दीवाली तिहार चो पहिल ‘बोनस तिहार’ बनाउंदे आरू सपाय जिला मन ने बोनस देउन किसान भाई बहिन मन चो हरिक के आगर करवां ।

-मंय फेर एक हार बलेंसे कि आमचो राष्ट्रीय नेतृत्व आरू माननीय प्रधानमंत्री श्री नरेन्द्र मोदी जी बाट ले दिलो हिमत आरू चिन्ता करून करलो फासला हिसाब ने प्रदेश चो किसान मन के बोनस देतो काजे बाट मिरली, जेचो काजे मंय आपलो बाट ले आरू किसान मन चो बाट ले हुन मन के धन्यवाद पठायेंसे ।

महिला उद्घोषक

-डॉ0 साहब, आमचो माननीय प्रधानमंत्री श्री नरेन्द्र मोदी जी भारत चो आजादी चो 75 वीं वर्षगांठ बलले सन दूय हजार बाईस तक ‘न्यू इंडिया’ (नुआ भारत) बनातो काजे सपाय के ‘पूरे एओत’ बलुन बललासोत । छत्तीसगढ़ एचो काजे कसन तियारी करेसे ?

मुख्यमंत्री जी

-माननीय मोदी जी बललासे कि सन् 1942 ने महात्मा गांधी पूरे रला आउर देस चो रैयत ‘अंगे्रज मन भारता छांडा’ ये नारा के आपलो मने धरू रला, जेचो 5 साल पाछे सन 1947 ने भारत के आजादी मिरली ।

-माननीय मोदी जी संकलप चो मान के सांगला आउर बललासोत कि संकलप चे सिद्धी चो बाट आय । हुन मन भारत चो आजादी चो 75वीं वर्षगांठ काजे गोटोक नुआ भारत गढ़तोर संकलप करलासोत ।

-असन भारत जे थाने आतंकवाद, सम्प्रदायवाद, जातिवाद, भ्रष्टाचार नी रोहो ।

-असन भारत जेथा स्वच्छता, नारी सशक्तीकरण पूरे दखा देओ ।

-असन भारत जेथा अंत्योदय चो सोर सम्पूरन होओ ।

-असन भारत जेथा किसान आपलो पांये उबा होओ, हरीक रहो आउर सावकार होओ ।

-असन भारत जे थाने जुआन मन के आउर मेहरार मन के आपलो सपना के पूरा करतो काजे सपाय मोहका मिरो ।

-ये सपाय गोठ हिसाब ने जमाय गोठ काजे आमी सोर बनालू से ।

-बरख 2022 तक किसान मन चो आमदानी के दूय गुना करतो काजे रोडमैप तियार आसे ।

-असन तो आमचो किसान मन एबे आगर करून धान फसल उपजासोत, मांतर आमी दूसर लाभ बीती फसल  चो उपजन आगर करतो काजे बले करतो उवाट बनालूसे ।

-खेती काम संगे संगे उद्यानिकी, डेयरी, पिगरी, फिशरी, रेशम, लाख, कृषि उत्पाद आरू वनोपज प्रसंस्करण जसन सपाय कमानी उवाट मन के जोड़लू से ।

-खेती कमानी चो भंडारण करतो सकत के सरलगा आगर करूंसे, संगे संगे मार्केटिंग नेटवर्क के बले नंगत बनाउंसे । ई-नाम बलले इलेक्ट्रॉनिक नेशनल एग्रीकल्चर मार्केट चो हिसाब ने प्रदेश चो 14 ठान मंडी मन के जोड़तो काम होउन गेली से ।

-सिंचाई करतो सकत के आगर करतोर काम होयसे ।

-किसान मन के शिक्षण-प्रशिक्षण आरू तकनीकी गियान के देउन हुन मन चो बाड़ती चो उवाट चलेसे ।

-आमचो सोर आय कि एबे खेती कमानी आउर एचो बाजार मूल्य 44 हजार करोड़ रूपया आसे, एके 2022 तक आगर करून 87 हजार करोड़ रूपया करतोर आय ।

-बरख 2018 ने सौ प्रतिशत विद्युतीकरण बललो ने सपाय बाटे बिजली अमरोतोर सोर के आमी पूरन करवां ।

-बरख 2018 ने आमी सपाय घरे शौचालय चो सोर के बले सारवां ।

-असनी साक्षरता, शिक्षा, कुपोषण, टीकाकरण, मातृ मृत्यु दर, शिशु मृत्यु दर ये सपाय सोर मन के बले पूरन करवां , जेचो काजे विभाग हिसाब ने कार्य-योजना बनेसे ।

पुरूष उद्घोषक

-माननीय प्रधानमंत्री जी कार्यक्रम ‘मन की बात’ ने 15 सितम्बर ले 02 अक्टूबर गांधी जयंती तक ‘स्वच्छता ही सेवा’ अभियान चलातो काजे सपाय के हाक दिलासे । छत्तीसगढ़ ने तुमचो काय उवाट आसे ?

मुख्यमंत्री जी

-स्वच्छता आमचो प्रधानमंत्री चो मन चो विषय आय । हुन मन साफ सफई के जनता काजे वरदान मानुआत ।

-असन तो साफ सफई कयेक चीपा मन के गुचाउ आय, येई काजे ये सबले बड़े सेवा आय । प्रधानमंत्री जी साफ सफई के जनता चो अभियान बनाउन दिलासोत आउर गांधी जयंती के एचो चीना बनालासोत ।

-आमी छत्तीसगढ़ ने 15 सितम्बर ले 02 अक्टूबर चो मंजी बड़े अभियान चलावां, जे थाने जमाय जन प्रतिनिधि मन ले धरून सहर चो आरू गांॅव चो जन प्रतिनिधि बले काम करदे । ये समया ने आगर ले आगर ठान मन के ओ डी एफ जाहला करतो काजे उवाट करतोर होयदे, काय काजे कि ए हिसाब ले आमचो 2018 चो सोर के आमी पाउक सकुंदे ।

-स्वच्छ शौचालय के बावरतो काजे जागरूकता अभियान चलातोर होयदे । आमी साफ सफई चो टकर पाड़तो के धियान देवा आरू समाज चो सपाय हिसा चो लोग मन के सामिल करतोर हिसाब होयदे ।

माननीय मोदी जी चो जनम दिन

-गोटोक आउर खुशखबरी हरीक बीती गोठ मंय तुमके सांगेंसे, हरीक के बाटेंसे ।

-आमचो लोकप्रिय आरू यशस्वी प्रधानमंत्री श्री नरेन्द्र मोदी चो जन्मदिन 17 सितम्बर के आय ।

-गेलो तीन बरख चो खूबे आरू सरलगा सेवा करून हुन मन देस चो रैयत चो मन के जीतला से । गरीब आउर कमजोर तबका चो जीवना ने नुआ आसा आनतो काम करलासे ।

-मंय अपील करेंसे कि आमी सपाय मिसुन मोदी जी चो जनमदिन 17 सितम्बर के ‘सेवा दिवस’ बलून मनाउं ।

-ये दिन ने प्रदेश चो अस्पताल मन ने, महापुरूष मन चो मूरित मन ने, बाग-बगीचा मन ने, सार्वजनिक ठान मन ने, बस स्टैेण्ड ने, रेल्वे स्टेशन ने, स्कूल-कॉलेज ने, तरई मन ने, गरीब बस्ती मन चो लगे स्वच्छता अभियान/साफ सफई अभियान चलातोर होओ ।

-गरीब बस्ती मन ने आउर दूसर ठान मन ने मेडिकल कैम्प लगातोर होओ । सामाजिक आरू स्वयंसेवी संगठन मन बाट ले सेवा चो काम करतोर होओ ।

-मोदी जी बाट ले बाट दखातो के साफ सफई आउर दूसर काम ने जनता भाग धरेसे, असन सपाय बाटे जे दखा दयेसे, हुनी गोठ के मंय तुमी सपाय के सांगेसे ।

-मुंगेली जिला चो लोरमी विकासखंड चो ख्ंिाडिक माहा जुआन मन मोचो लगे एउ रला । हुन मन सांगला कि लोरमी ने सर्वदलीयन मंच चो गठन करलासे, जे थाने कयेक सामाजिक संगठन मन चो भागीदारी आसे । जनपद पंचायत, डड़सेना युवा मंच, मनियारी बचाओ अभियान ये सपाय । जुआन मन चो टोली चो लोग मन लोरमी चो मुक्तिधाम चो साफ सफई चो जिमा धरलासोत आउर रोजे अयतवार दिने हुता मसागत दान करसोत । मोके ये जानुन खूबे हरीक लागली कि लोरमी जसन ठान चो जुआन लेका मन अयतवार दिने पिकनिक मनाउक नी जाओत, पाहारले साफ सफई काजे निकरूक धरलासोत ।

-जुआन मन चो दल अबर मनियारी नंदी चो सफाई, बूटा मंडातोर, लाटा बूटा के मरलातोर आउर दवई छिचतोर ये सपाय काम के आपलो हाते धरलासोत । स्वच्छ भारत अभियान काजे असन खबर मन मिरतोर खूबे हरिक चो गोठ आय ।

-एबे 08 सितम्बर अंतर्राष्ट्रीय साक्षरता दिवस दिने छत्तीसगढ़ चो दूय ठान आगर आदिवासी बीती जिला मन-दंतेवाड़ा आरू जसपुर के आउर दूय ठान ग्राम पंचायत-कर्माहा(जिला सरगुजा), टेमरी(जिला रायपुर) के राष्ट्रीय पुरस्कार मिरली से ।

-साक्षर भारत अभियान हिसाब ने दंतेवाड़ा चो सपाय कैदी मन के साक्षर बनालो आसे । ये पुरस्कार मन मिरतो के प्रदेश चो मान बाड़ली से ।

-मंय अपील करेंसे कि सफल होलो असन कहनी मन के मोके सांगा । मंय एई मंच ले हुन कहनी मन के सपय के सांगेदे ।

महिला उद्घोषक

-सपाय सुनतो लोग मन । तुमचो मन चो गोठ आमके तुमो चिठी, सोशल मीडिया, फेसबुक, ट्विटर संगे संगे एसएमएस ले बले खूबे माहा मिरते जायसे, एचो काजे तुमी सपाय के खूबे खूबे धन्यवाद ।

-एतो समया ने बले तुमी तुमचो मोबाईल चो मेसेज बॉक्स ने आरकेजी चो पाछे स्पेस धरून आपलो बिचार के लिखून 7668-500-500 नंबर ने पठाते राहा आउर संदेश चो सरासरी ने आपलो नांव आरू पता लिखतोर नी भुलका ।

मुख्यमंत्री जी

-नवनीत प्रताप देव, दिलीप अग्निहोत्री, राज सिंह आहूजा, वीरेन्द्र मलहोत्रा, योेगेन्द्र वर्मा, हरि राम, आशीष भट्टाचार्य, आलोक नीर, चुन्नी लाल साहू, सुजित शाजी, संजीव तिवारी, के.पी. कैवर्त, चन्द्रहास पंडा असन खूबे झान संगवारी मन 5 हजार दिन सारतो काजे मोके बधाई दिलासे । तुमी सपाय के आभार आरू धन्यवाद ।

-सतीष भट्टर लिखलासे कि प्रदेश चो कयेक जिला ले अखिल भारतीय सेवा काजे जुआन मन चो चयन होतोर ये गोठ के सांगेसे कि लागू करलो योजना मन गांव गांव तक अमरेसे ।

-खिंडिक असन सलाहा मन शाला भवन आरू साफ सफई काजे आत ।

-तुमचो सलाहा ले मोके बाट मिरेसे । तुमी सपाय के धन्यवाद ।

 

पुरूष उद्घोषक

-अबर सुनतो लोग मन, पारी आय क्विज चो ।

-सोलवां क्विज चो सवाल रहे-

-छत्तीसगढ़ शासन बाट ले जुआन लोग मन काजे कौशल प्रशिक्षण चो कानून कोन सन ने बनातोर होली ।

-येचो सही जवाप आय  (ए) 2013

-सबले पहिल जे पॉंच झान सुनतो लोग मन सही जवाप पठालासे हुन मन चो नॉंव आये-

01.श्री संदीप कुमार दुबे, बालोद

02.श्री पवन दास, ग्राम झलप, जिला महासमुंद

03.श्री राकेश कुमार सोनी, तिल्दा नेवरा, जिला रायपुर

04.श्री श्यामदास महंत, भिलाई-3, जिला दुर्ग

05.कुमारी आरती साहू, रायपुर

महिला उद्घोषक

-अबर समया आय, सतरा नं0 चो क्विज चो, आरू आची चो सुवाल आय-

-पं. दीनदयाल उपाध्याय शैक्षणिक परिसर, स्याहीमुड़ी कोन जिला ने आसे ?

-एचो सही जवाब  (ए)  जशपुर

                 (बी) कोरबा

  ये दुनों ने गोटोक आय

-आपलो जवाब देतो काजे, आपलो मोबाईल चो मैसेज बॉक्स नं क्यू ए लिखा आउर स्पेस देउन ए नाहले बी जे बले तुमके सही लागेसे, हुन गोटोक अक्षर के लिखून 7668-500-500 नंबर ने पठाउनल दिया । संगे संगे आपलो नांव आरू पता के लिखा चे ।

-तुमी सपाय ‘रमन के गोठ’ सुनते राहा, आउर आपलो मन चो गोठ के बले आमके सांगते राहा । एचय संगे संगे आजी चो ‘अंक’ के आमीच एथाय सारूंसे । एतो अंक ने 08 अक्टूबर के होयदे-तुमचो संगे फेर भेंटघाट । हुतरो दिन काजे दिया फेर आमके बिदा । जुहार ।